【Now新聞台】歐聯分組賽，出線形勢最緊湊的B組，國際米蘭包尾出局，皇家馬德里則於主場2比0擊敗慕遜加柏，小組首名出線。
盧卡斯華斯基斯傳中，賓斯馬一頂入網，9分鐘就為皇家馬德里開紀錄。賽前排榜首的慕遜加柏，落敗都有機會出線，教練賀沙更稱要將銀河艦隊淘汰，但接應妙傳單刀的皮里亞錯失追平大好機會。
皇馬就於32分鐘，由賓斯馬接應洛迪高的傳中，頂入他今場第二球，拉開到2比0優勢。半場有不少擴大比數機會，其中摩迪近門一腳，未過到桑馬，臨完半場他接應，賓斯馬回傳抽入，但又越位在先不算數。
全場皇家馬德里有19次埋門，當中7次中龍，但桑馬無再失守，加上門楣和門柱一再幫忙之下，皇馬沒再拉開，但2比0勝局都足以取得首名。
落敗的慕遜加柏賽後圍起看球，知道另一場的賽果，開心得捧盃一樣。
皆因同組的國際米蘭和薩克達賽和「攬炒」，拿奧達路馬天尼斯早段中楣，下半場盧卡古企定定，幫薩克達擋出山齊士頭槌，最終踢成0比0。
分組賽兩循環都擊敗皇馬的薩克達，對賽成績不敵慕遜加柏，要轉戰歐霸，國際米蘭包尾出局。
A組的馬德里體育會作客薩爾斯堡，憑卡拉斯高的努力，先於上半場罰球助攻給阿莫素，換邊後自己都入一球，為馬體會帶來兩球勝局，取得次名出線席位，薩爾斯堡則要踢歐霸盃。
