【Now Sports】英格蘭有驚無險殺入世界盃4強，面對多年宿敵阿根廷再次落敗。筆者作為資深英軍擁躉，深知對愛隊是不能有任何期望，但今場波仍令我睇到眼火爆，英軍在領先一球優勢下，太早泊大巴諗住守到完場，結果出事。領隊杜曹如此Game Plan，請問和修夫基有何分別？
撰文：Jansen（英格蘭擁躉）
4強大戰當前，上半場雙方明顯試探味濃，不敢貿然壓得太前進攻，以免稍一不慎被對手截糊打反擊，換言之即是悶戰。唯一較精彩是球員之間的埋身肉搏戰，以及互相投訴對方犯規的肉緊場面。
下半場一開始，戰局仍然膠著，兩隊靜待一次打破僵局的機會，結果由英格蘭率先獲得甜頭，今次終於唔係靠比寧咸或哈利簡尼，而係靠哥頓一次超靚的後上入楔近射破網；當然摩根羅渣士的傳中球亦斬得非常「毒到」。
英格蘭領先後，自然輪到阿根廷開始著急，取回大部份控球和攻勢亦順理成章。杜曹（Thomas Tuchel）早在72分鐘換走入球功臣哥頓、換入干沙加強防守亦無錯，但最錯是他此時已下令泊大巴，以為球隊可以像16強對墨西哥那場一樣，成功守到完場。不過杜曹實在太天真了，今天你的對手是衛冕強隊，進攻能力比墨西哥強得多，要不是門將碧福特再有神救兼門柱救駕，英軍早已兵敗如山倒。
沒有期望，就沒有失望，一直是本人多年來支持英格蘭的座右銘，今場失利亦在我估算之內，只是想不到杜曹就跟修夫基一樣保守，咁重金請佢嚟教有乜作為？2018年世界盃，初上任的修夫基成功帶領英軍晉身4強，8年後杜曹同樣做到了，亦同樣因為龜縮換來輸波結局。季軍戰對法國，相信愛隊會成為法國的出氣袋，吾不欲觀之了。
撰文：Jansen
前音樂雜誌《mcb》作者，現開設了「字裡知音人」樂評網站。愛音樂，亦愛足球。音樂口味非常大愛，會聆聽及Respect不同音樂類別；足球就十分專一，只捧曼聯和英格蘭。
【躉我講隊波】由列強擁躉在每場比賽後講愛隊。
