【A&M Diary】「佢…贊助過無數學生
佢贊助嘅學生，令佢獲獎無數
佢鑊鏟下嘅，每一碟都係用心製作
仲贊助？成個學生會都俾你心心喇！」
平時去唔少餐廳，都會見到貼上雜誌嘅介紹，而呢間位於西環堅尼地城嘅可可店，雜誌嘅介紹就欠奉，但就見到勁多感謝狀！細看之下，原來老闆經常贊助各間大學嘅學生活動，深受學生嘅喜愛！而附近嘅街坊都因為價錢大眾化，好鍾意嚟呢度食吓嘢！今日同A姐M佬行完西環海中心公園，就嚟到可可店食晚餐啦。
香煎蛋腸粉
腸粉叫即煎，所以食落熱辣辣，加入埋雞蛋，令腸粉更加香滑，加入埋醬料，更加好味。
咖哩三寶
三寶有魚蛋、蘿蔔同豬皮，最欣賞佢個蘿蔔，唔老無渣。但咖哩汁係上枱時淋上面，所以唔夠入味。
合時燉湯
燉湯有好多款，我哋分別叫咗杏汁燉豬肺、西洋菜燉排骨、金銀菜燉豬肺，碗碗都勁足料，而杏汁燉豬肺有勁香濃嘅杏汁味，仲有成5舊豬肺，豬肺勁乾淨！飲完碗燉湯非常暖胃好滋潤！如果配飯飲燉湯仲有優惠添。
豉汁蒸排骨
排骨份量多，好入味，而排骨底下嘅豆卜先係精華所在，索晒汁，送飯一流！
豉汁炆釀涼瓜
5件大大涼瓜，入面釀滿豬肉，好飽滿，真係好有屋企嘅味道。
豉汁豆腐蒸魚塊
魚塊無骨好滑，啖啖肉又索晒汁，加多碗飯吖，唔該！
