【A&M Diary】一碗拉麵最緊要就係夠熱，但點解喺英國食親嘅拉麵都唔夠熱㗎！作為拉麵控嘅M佬話已經對英國嘅拉麵無任何期望，直到今日我哋嚟到Okan Brixton East，餐廳真真正正由日本人主理，拉麵又香又夠熱，加上餐廳嘅日式風格設計，讓我哋終於能夠喺英國品賞到一碗值得推介嘅拉麵俾大家。
日式餃子
餃子可以揀雞肉或豬肉，我哋就揀咗豬肉。餃子係自家製作，餃子皮薄，餡料十足，咬開仲有唔少肉汁，味道非常豐富，但可能餃子皮比較薄，所以唔會煎到脆邊口感。
Fukuoka Tonkotsu Ramen
餐廳有四款拉麵選擇，分別係醬油拉麵、素食拉麵、麵豉拉麵，同我哋選擇嘅豚骨拉麵。九州嘅豚骨拉麵一向都係我哋嘅最愛，Okan Brixton East嘅湯底呈奶白色，充滿豚骨香味，非常濃郁，最重要係夠晒熱辣辣；拉麵爽口又夠幼細，麵身掛上豚骨湯，惟拉麵份量比較少；配料方面除咗芽菜仲有日式叉燒，日式叉燒肥瘦分明，帶有焦香味，一啲都唔油膩。
