【A&M Diary】就嚟情人節，就梗係需要私人空間同浪漫嘅情人節大餐啦！不過，近期晚市又禁堂食，想滿足呢兩個願望，staycation就最適合喇！今日M佬就book咗一向以高CP值見稱嘅尖沙咀百樂酒店，雖然百樂酒店唔係行奢華路線嘅星級品牌酒店，但M佬話今次情人節會有唔少驚喜，包保我滿意喎！
酒店大堂
百樂酒店位於尖沙咀鬧市，對面就係歷史博物館同科學館，行過兩條街就係Donki同多個大型商場，大家可以自製尖沙咀一天遊呀！酒店嘅check-in時間係2點，不過，我哋早咗45分鐘嚟到，都可以順利上房。整個check-in過程都好smooth，雖然職員好詳細講解staycation package嘅內容，亦核實送餐上房時間同注意事項，但就隻字不提房間嘅所有驚喜，以保持神秘感。
房間區域
今次安排入住15樓嘅首選客房，房間面積闊落，加上酒店喺2020年先完成房間裝修翻新，所以房間新淨，裝修設計時尚簡約，非常舒適，而落地玻璃窗外嘅風景就以尖東樓景為主，因為我哋住得比較高，仲可以望到少少維港對岸嘅景色，都算開揚。
另外，今次嘅package係「浪漫滿屋」情人節住宿計劃，所以房間已預先佈置，有百樂小熊、花瓣同氣球，仲有一大紥玫瑰花呀！真係好驚喜呀，我仲一度懷疑呢個係咪求婚活動囉！
當然一間房入邊，最重要就梗係張床啦，首選客房選用特大雙人床，枕頭有兩個，床褥軟硬適中，加上窗簾嘅遮光度十足，第二朝可以瞓到自然醒。
房間入邊亦有Nespresso咖啡機同膠囊，可以喺偏廳梳化嘆杯咖啡，都幾relax！房間入邊亦有夾萬、雪櫃、書枱同樽裝水。另外，充電位都唔少，喺床邊更加設有多個USB充電位，夠晒方便。至於，房間嘅電視機都幾大部，頻道選擇唔少，除咗本地電視台，亦有多個衛星台、電影台同體育台，選擇都幾多。
浴室區域
浴室簡潔光猛，乾濕分離，除咗企缸，仲有staycation最愛嘅浴缸，可以自己帶備浴鹽或準備泡泡浴。洗手間亦有浴袍同風筒，至於個人用品齊全，有剃鬚刀、牙膏、牙刷等等，至於沐浴露、洗頭水、護髮素就係用自家品牌，味道都ok嘅，不過長頭髮嘅話就有機會打kick啦。
娛樂設施
酒店雖然設有健身室，不過喺疫情期間，就未有開放。
餐飲服務
酒店設有2間餐廳及酒吧，我哋今次嘅staycation就包咗客房晚餐同早餐。
客房內享用西式精緻晚餐
酒店嘅晚餐room servises服務就麻麻喇，首先，送餐上房嘅同事完全無打招呼亦無笑容，我哋一打開門，佢就直衝入房，就連我哋同佢講唔該，佢都完全冇任何回應。送嚟嘅野食又甩漏，連支有汽酒都漏咗，我哋最後要打兩次電話落去，啲野食先全部送齊，好彩晚餐非常豐富。
頭盤係12個月西班牙山毛豬配哈蜜瓜；冷盤係海鮮拼盤，海鮮有蟹腳、海蝦、白蜆、紐西蘭青口同翡翠螺；餐前小食就有洋蔥芝士辣肉焗生蠔；餐湯係西班牙蛤蜊辣肉腸酥皮湯配餐包；主菜可以四揀一，我同M佬分別揀咗香煎牛柳配鵝肝紅酒汁、香煎東星柳配鮮茄扁意粉；甜品就係酸車厘子白朱古力蛋糕拌自家製西班牙吉拿棒；最後，仲有一人一杯飲品作結。真心嚟講，呢個set嘅味道都唔錯，其中海鮮拼盤真係好豐富，非常新鮮；酥皮湯勁足料；牛柳生熟度啱啱好，肉質軟腍，都好juicy架！不過，餐包係超硬，食都食唔到。
