【Now新聞台】截至早上11點，1小時內《彭博》用戶關注度上升最多嘅港股，依次為時代中國控股、中教控股、華潤置地、弘陽地產、龍光集團。
教育股連日受壓，多隻教育股都仲未止跌，中教今日最多跌逾20%，日前市場傳聞，中央要禁止持有境內學資產嘅公司喺境外上市， 雖然內媒已經積極澄清，但似乎都俾唔到市場信心，經歷去年暑假，教育股因為政策變動，令業務生態出現180度轉變後，依家有咩風吹草動，投資者係咪寧願相信傳聞，都唔信澄清報道？
圓通環球金融集團行政總裁曾永堅指，教育股可以話係其中一個令市場杯弓蛇影嘅板塊，一有啲咩風吹草動、未澄清嘅傳聞，都會對相關股份造成拋售壓力，好多投資者都寧願先離場，睇定啲先考慮再入市。教育依家作為中央政府關注嘅領域，中央唔希望外資影響教育，所以禁止教育股境外上市嘅傳聞特別容易令投資者相信，喺市場未估到中央有咩實際行動前，相關股份仍然會有較大沽壓。
