可以周圍去、周圍食，仲要人工高，天下間有咁筍嘅工？美國調味品公司味好美（McCormick & Company）最近推出一個全新職位—「捲餅關係主任」( Director of Taco Relations)，每星期只需工作20個鐘，仲可以環遊全美試食捲餅，月薪高達2.5萬美元（約19萬港元），簡直係絕世筍工！
「捲餅關係主任」係一個兼職職位，主要工作內容包括到美國各地試食捲餅，搵出捲餅市場嘅新趨勢；同公司團隊合作研發新口味嘅捲餅食譜；到味好美馬里蘭州總部出差；通過社交媒體推廣食捲餅等等。兼職日期由今年9月起至12月，月薪有2.5萬美元，員工每周只需遙距工作20小時，當中約有10%時間要參加公司線上會議，4個月後就輕鬆賺到10萬美元（約78萬港元）。
味好美對應徵者嘅要求都好簡單，只要年滿21歲，有美國居留權、有效駕駛執照就可以申請，最重要係要對捲餅充滿熱情！所以申請人報名時需附上一段2分鐘片段，展現自己個性，同時表達有幾鍾意捲餅，如果好彩被取錄，78萬人工就袋袋平安！
Photo／Pixabay
