【Now新聞台】截至早上11時止，《彭博》Top Search No.1為中銀航空租賃，第2位至第5位分別為海螺水泥、中國人壽、新鴻基地產及中國生物製藥。
中銀航空租賃有消息指會向聯合航空購買22架波音飛機，然後再租返俾聯合航空，交易料今年完成，舉動就如上月向國泰購買約55億的飛機，再租賃俾國泰一樣。有內地媒體報道，佢哋擬發約150億高級無抵押美元票據，以保證有充足資金購買飛機。但疫情拖累航空業，佢哋仲入手買咁多飛機，係咪明智嘅決定？
協同博勤金融集團行政總裁曾永堅指，雖然疫情肆虐影響航空業，但始終中銀航空租賃最大嘅持份者係中央，估計疫情結束後，中美可能會出現另一波競爭，無論喺商業定係政治角度上，都唔排除會以航空產業作交換條件。
Jasper又話，未來中美兩國對航空需求，只會有增無減，所以疫情情況好壞，都影響唔到飛機租賃呢類長期業務。
