【Now新聞台】截至早上11點，《彭博》系統Top Search No.1是領展房產基金，第2至第5位依次為新世界發展、越秀地產、電能實業及國泰航空。
嚟到2月最後一個交易日，今個月環球股市暫時延續1月強勢，A股表現標青，上證綜合指數今個月暫時升14%，係環球主要指數中最強勢。
上證目前劍指三千，主要係憧憬聽朝MSCI明晟有機會調高A股喺指數中嘅比重，指數上升，似乎係有外資力量幫手。不過，上證舊年嘅表現係十年以嚟最差，累積跌24%，喺環球指數中排尾二，到底目前係熊市中嘅反彈浪定係已經轉勢，都仲未講得埋。
