【Viu】「天王嫂」方媛、蔡思貝、麥秋成、王丹妮、蔡一鳳、許恩怡等今日出席時裝活動，方媛透露「三寶」早排首次識嗌爸爸媽媽，全家人都好開心，仲爆「大寶」同「二寶」依家唔止聽Baby Monster，亦有聽爸爸嘅歌，連城城嘅招牌舞蹈動作「Generation Next」都識跳，好Cute呀！至於早前拍攝內地綜藝節目嘅風波，方媛就不欲多談，問到會唔會影響心情？之後未必敢再接幕前演出？佢大方話：「都還好，我覺得就是一個學習的過程！」
至於蔡思貝同舊愛麥秋成前後腳現身，兩人受訪問都話唔尷尬，之前亦試過同場，今日亦有打招呼。而蔡一鳳就回應返入稟追討趙薇前夫黃有龍1億中介費一事，雖然早前高院裁定敗訴需付訟費，但蔡一鳳表明會上訴求公道。
此外，王丹妮表示囡囡今日正式成為中學生，今朝有送佢出門搭巴士，但聽到囡囡升中學等於好快拍拖時，佢就激動話：「啋！」曾飾演梅艷芳嘅丹妮，對於梅媽逝世再爆爭產風波，佢慨嘆家家有本難唸的經！
