【Viu】電影《功夫女足》完成一日謝票後，直落晚上喺戲院內舉行首映禮！繼續由導演周星馳領軍，聯合導演林子聰、編劇Miss Hunny何穎璇，同一眾演員劉嘉玲、迪麗熱巴、張繼聰、雪野、蔡思貝、胡予安、雪野、張天一、倪好、何穎璇、RIIANA齊齊現身！就連周星馳媽咪、家姐周文姬都有到場撐仔仔，星媽見傳媒更超熱情揮手，而陳國坤同仔仔陳真都有嚟睇戲！
星爺同老best劉嘉玲全程狂鬥嘴，SLDPK！劉嘉玲笑言星爺破壞佢形象，然後指自己喺片場係好尊重導演星爺兼聽話，而星爺則話同劉嘉玲合作係充滿默契！當問到劉嘉玲《女足》吸引之處，佢秒答話因為有佢，仲話呢個答案係星爺教！
被星爺稱呼做「巴爺」嘅迪麗熱巴，遭踢爆私下零運動底子，但拍戲個效果係令人驚嘆！同時獲星爺、林子聰力讚，迪麗熱巴只好怕醜掩面加謙虛否認！思貝提起星爺形容佢係女版李小龍，直認受寵若驚，透露自casting完後就搵以前合作過嘅武師習武，舖路之後想做打女？成為香港版poster主角嘅感受如何？
「球證」張繼聰直言同星爺合作係永遠都唔夠喉，拍戲時將所有注意力都放晒喺星爺身上，忙於喺演員、Fans呢兩個mode切換！聽聞星爺有意開拍續集，阿聰會舉手自薦？不過阿聰、思貝都話到依家都唔敢搵星爺集郵，所以阿聰話唯有cap低同星爺同場嘅相send畀喺身在外國嘅仔仔曬命！阿聰話之後會同仔女一齊睇，惟近日Grace陳凱琳帶3個仔睇戲鬧風波，作為家長嘅阿聰又點睇？同屆港姐思貝有冇問候Grace？
林子聰獲一對仔女入場支持勁冧豬，笑言仔女曾睇完《少林足球》問佢係咪可以隨時飛起！佢仲指一對小朋友都勁鍾意跳舞、又有演戲天分，是咪可以原地出道？囡囡成首位聰女郎？《女足》即將喺香港上映，林子聰指希望令觀眾肯入返戲院睇戲，雖然今次太趕未有粵語版，但都唔係件壞事！運動員胡予安自爆曾教過星爺Wakesurf，大讚呢位學生好肯嘗試，練成多個高難道動作，例如係360自轉加跳起動作，超勁呀！另一位星女郎雪野就話開心同星爺合作，但頂住「星女郎」呢個title確實係有壓力！
另外，林子聰除咗透露有喺電影最尾向吳孟達致敬之外，提及「四哥」謝賢日前離世，佢話收到噩耗當日全team停止一日宣傳，以向四哥默哀致意！
