【Viu】林憶蓮一連兩場《迴響巡迴演唱會 RESONANCE : Reconstructed Hong Kong Exclusive》 ，今晚喺啟德主場館圓滿結束，全晚氣氛熱烈！個唱至尾段，Sandy獻唱《破曉》時，喺一個類似恐龍骨嘅舞台出場，非常有氣勢！
後來唱完《喜樂》後，向來少說話嘅佢都特登同觀眾傾吓心事，其時現場歡呼聲震天，佢話忍咗唔喊好耐，然後有少少哽咽，又不停開心講多謝，見有歌迷想送花，佢都特地叫工作人員幫手收！Sandy平復情緒後話巡迴演唱會做咗一年，卒之最後一站返到嚟，因為香港係佢成長嘅地方，亦係佢最在乎嘅屋企，但都同團隊討論過係咪應該返香港做呢？因為啟德好難book，佢亦要考慮係咪做到一個專屬香港嘅演唱會，講到呢度佢終於忍唔住喊出嚟，然後又喊住抹住眼淚再講：「因為香港俾咗我好多好多，所以我亦都希望可以將最好嘅帶俾你哋大家！」
Sandy又話希望觀眾記得呢晚一齊分享嘅每個片段：「雖然生活中我哋唔可以每日都過得好順暢，或者每日都過得好如意，我哋每每都會有脆弱嘅時間，有需要啲力量嘅時間，我希望大家喺需要力量嘅時候可以記得今晚我哋一齊分享過嘅愛同埋感動！」佢又講到記得當年嘅香港樂壇，係大家好努力而成就嘅樂壇，「雖然我已經離開咗一段時間，但係我仍然都係為過去嘅努力覺得驕傲！我哋俾多啲掌聲香港樂壇每一位仍然努力不懈嘅朋友，希望佢哋可以更加更加有多啲信心去將音樂做得更好！」
Sandy最後行上平台再坐升降台，上到半空唱《再見悲哀》，唱完向觀眾鞠躬致謝後就轉身離開，瀟灑有型！而呢晚捧場嘉賓有鍾楚紅、陳慧琳、鍾珍及蔡一智等，快啲睇現場實況片啦！
