【Viu】韓星李帝勳今晚喺麥花臣舉行20周年fanmeeting「Our 20th Moment 2026 LEE JE HOON FANMEETING」香港站！Oppa一開始就喺後場唱住《Coffee With Me (yours)》出場，送上第一份大禮！佢仲邊唱邊同「only you」近距離互動，又揮手又派心咁，冧死全場fans啦！
冧爆only you嘅第二招就係用廣東話打招呼：「好掛住你哋！我愛你哋！」Oppa講完就勁怕醜掩面，好可愛呀！原來Oppa已經隔咗3年冇嚟香港，仲記得上次佢嚟香港嗰陣話想揸香港嘅紅色的士拍《模範的士》，Oppa即公開爭取嚟香港拍《模範4》呀！集氣呀！
喺直落嘅Q&A環節，Oppa有share keep fit routine，當問到依家嘅腹肌狀態嗰陣，Oppa突然派福利褸咗件西裝褸大晒一對結實麒麟臂，二、三頭肌線條清晰可見，呢個幸福堅係嚟得突然！
而自稱「派心中毒者」嘅李帝勳向住三面嘅only you連環派心放生電，邊位only you能夠抵擋得住？Oppa又指當感到壓力，就會諗起梁朝偉嘅一句說話紓解，究竟係邊句說話？
之後大會設李帝勳嘅作品頒獎禮，分傳奇登場獎、Flirting獎、呆萌可愛獎，最後全部都由《模範的士》嘅作品片段勝出！Oppa又喺呢個section抽出幸運嘅only you做對視十秒任務，佢仲加碼送埋深情抱抱，要尖叫啦！
跟住李帝勳以「彩虹運輸」名義，向only you速遞鮮花，「運輸」嗰陣又使出超多冧女大絕，就算冇得收花都勁幸福呀！最後，帝勳Oppa再表演埋撒嬌Overdrive，加捧住20周年嘅蛋糕同only you影大合照！
