【Viu】台灣天團五月天喺啟德主場館舉行4場25周年巡迴演唱會香港站《#5525+1 回到那一天》，繼噚日（24日）嘅綵排場後，今日（25日）終於係真·頭場啦！五子一如往年s坐住「專機」嚟到啟德主場館，逐一「落機」接受「五迷」嘅歡呼聲！
全場五迷一聽到《OAOA》起歌就秒彈起身揈住螢光棒一齊大合唱！之後五子輪住向五迷打招呼，阿信表示感謝五迷嚟到呢場誕生喺風雨之中、得來不易嘅場次，石頭、怪獸、瑪莎都話今晚要五迷high返一晚！
至於輪到冠佑壓軸發言嗰陣，同樣叫大家要將focus放喺瑪莎身上，如果見到佢偷笑即係代表佢彈錯，而喺阿信「質問」下，瑪莎以「吃燒餅哪有不掉芝麻的」反擊，點知牽連出「蛋撻」、「菠蘿包」等「人」出嚟，瑪莎嚟到香港究竟「食」咗咩？
唱到中段，紅色跑車「MAYDAY0329」再次出動，拎住煙槍嘅阿信超hyper，邊唱《派對動物》邊勁鬼馬咁狂瞄住瑪莎、冠佑嚟發射！而石頭同冠佑則一早落咗台行到後方嘅小舞台親親五迷，阿信隨後跟上，唱《離開地球表面》嗰陣狂叫五迷jump，將氣氛拉至最高點！唱到《戀愛ing》，阿信索性行埋去五迷堆中零距離接觸，勁正呀！五子又同五迷一齊玩節奏挑戰，頭場阿信挑戰成功？
五月天今年喺生日周嚟到香港開騷，趁29日正日生日前，大會攞咗以菠蘿包砌出嚟嘅生日蛋糕同五子慶祝，阿信仲點名感謝周杰倫隔空送上飲品祝賀，笑話飲得出「太陽之子」嘅味道，順便幫周董嘅新碟宣傳，堅係老best！阿信更食住菠蘿包唱《突然好想你》添！另外，五子喺第一個encore位唱咗《私奔到月球》、《倔強》，又同五迷細訴喺香港開騷嘅一點一滴，依家先睇實況片！
