【Viu】Anson Lo盧瀚霆呢日晨咁早出席博愛單車百萬行，幾乎天未光就到，佢話全晚冇瞓過就嚟，慣咗唔瞓都function到，亦冇諗過活動完咗返去補瞓，以免搞亂生理時鐘喎，小編見佢都超精靈呀！撈撈話呢排啲感冒菌好勁身邊好多人都病，佢自己拍MV前都作感冒，拍完勞碌完就病，不過都好返晒！冇錯，係拍MV呀，佢嚟緊25號就出雙單曲，一首快歌一首慢歌打孖嚟，係2026年打頭陣嘅音樂作品呢，不過佢只揀咗其中一首拍MV，都期待呀！撈撈話都想出返多啲慢歌，出道8年各種曲風都試過，佢當然都想有突破，而呢首歌係成功搵到新曲風呀，更加期待呀！
講到下月初登神澳門騷，撈撈透露已出rundown，呢幾日會開始排練，當中有好多二人合唱，因為唔想每人一part獨唱之後合唱就算，佢同Edan都有共識呢個係一個有誠意之作，主要想回報fans，咁會唔會同Edan嚟part battle？撈撈謙虛又幽默咁話要向Edan學習，追趕佢嘅步伐喎！
至於Stanley年底結婚，撈撈話準新朗俾佢任務係「只要靚」，不過撈撈係覺得自己deserve有能力幫手嘅位置，可以提供情緒價值，又可以頂酒咁架！再講到之前孖Edan同Jeremy去阿姐度拜年，佢特登唔食嘢留肚去食糕、雲吞，仲大讚阿姐嘅齋係最好食嘅，想知多啲就睇足本訪問啦！
