【Viu】一連兩場《Jeremy 李駿傑X趙增熹慈善音樂會》今晚喺麥花臣場館開鑼，Jeremy唱出由趙增熹老師重新編曲嘅《You First》同《九》揭開序幕，其後分別重新演繹梅姐同哥哥嘅金曲《似水流年》同《追》，好聽到耳朵懷孕！期間趙增熹老師笑指《似水流年》同《追》推出時，Jeremy應該未出世，笑爆全場，不過Remy就話自己鍾意聽舊歌，唔止媽咪鍾意㗎，超識做！
之後Jeremy送上高難度歌曲《阿波羅》，高音甜中音準低音勁係常識，最正係連趙增熹老師彈完都呻辛苦，彈到成身汗，即刻拎紙巾出嚟抹汗，Remy都忍唔住話呢首歌係辛苦㗎！期間由趙增熹老師鋼琴伴奏、湯駿業聲音導航下簡介藝術家黎炳昭嘅生平，相當精彩，快啲睇現場實況啦！
