【Viu】教主Anson Lo喺新加城演出《Waterbomb》，半粒鐘唱跳足7首歌，盡顯功力，又勁又精彩！佢完美演出完後，今日返抵香港，傍晚時份步出機場，心情靚靚分享第一次參加《Waterbomb》嘅感受！教主話平時成日睇呢個活動，冇諗過自己可以參加，當然好興奮，呢個活動signature係着到夏天好沙灘，所以露少少肌肉係必須的！但點解冇除背心？因為第一次要好「safe」囉！如果人生有第二次，佢就可以冇咁safe，到時可以大膽啲喎！
噚日有400神徒特登拉隊去應援，教主直言超級感動，喺海外見到熟悉嘅面孔，或者甚至未見過嘅，只要每次見到粉紅海，佢就會覺得好安全，「花姐都話我好緊張，但係上到台就冇咁緊張！」
表演時教主都好配合主題，用水樽淋自己，又向觀眾射水，教主話：「玩水都幾開心，對上一次好似係中學，俾大家水槍攻擊我，我又攻擊返大家係10年前嘅事啦！」咁有冇見到花姐為咗拍片都全程濕身？教主話唔近個台都會濕，根本個水炮係大到全個場都會濕晒，「我哋一落到台就好似滴水，好似喺個海度上返嚟！」
噚晚演出完畢去咗食宵夜，佢去到先知係上次同隊友一齊去食過嗰間，入到去成間鋪又變咗粉紅海，好似開咗個小型見面會咁，好開心！仲有一件開心事，教主見Anson road，係佢今趟行程好好嘅回憶，快啲睇訪問片啦！
