【Viu】開學前夕嘅晚上就係林家謙《White Summer》紅館騷嘅尾場！家謙個自肥計劃去到第十晚，禮物盒照原定schedule升上台，林伯唱住《四月物語》現身，但呢晚個盲盒遲遲未有打開，點知打開嘅一刻⋯ 竟然係咁？林伯認真鬼馬！
林伯再講經話人生就好似禮物盒咁，唔係樣樣嘢都順風順水，好多時都係一啖砂糖一啖屎！佢又話喺呢個騷嘅頭幾場，遇到啲kick kick哋嘅事，突然就諗起宣萱一番說話，究竟呢番說話有咩魔力？就喺呢個moment，林伯產生請宣萱嚟睇騷嘅念頭，仲膽粗粗問埋可唔可以合唱，能令宣萱開金口，呢單嘢真係大癲！
期間林伯又再話自己6歲就係睇對方拍《難兄難弟》大，所以佢哋就揀唱咗主題曲《難兄難弟》，超surprise！宣萱難得上紅館台，佢又自稱成日聽家謙嘅歌，臨落台再合唱多首《在空中的這一秒》！
個唱尾段，林指揮上線帶嚟《春日部》，之後就進入講經環節，期間佢特別點名感謝兩位詞人林夕、Wyman，分別寫咗《夏日之子》、《春日部》畀佢，就正正係呢個騷佢想講嘅意思！尾場嘅福利就係開放點歌環節，CLS終於聽到《拼命無恙》、《下一位前度》，大家滿唔滿意先？仲有，林伯臨尾除咗唱《有你聽我的故事》，更二度encore，連未有名嘅新歌都唱埋！
另外，尾場嚟睇騷嘅有Tyson Yoshi孖老婆Christy、胡子彤、阿正孖中醫細佬、Constance陳康堤、陳茂賢導演、Gin Lee、鄧小巧、許廷鏗、陳健安、Van@Nowhere Boys等！即刻睇實況！
