【Viu】林家謙嘅十場紅館騷已經唱到第八場，個唱最具標誌性嘅「360吊車」環節再次成為焦點，計仔多多嘅家謙喺呢晚嚟個反手自拍，嘗試喺吊車上同CLS影張selfie，但見佢手忙腳亂，靚相就好似唔多影到，反而係影低唔少超大頭特寫鼻窿相，呢單嘢真係笑到有腹肌！睇嚟CLS除咗要開「林家謙肚臍關注組」之外，仲要開多個「林家謙鼻窿關注組」啦！
到自肥嘉賓位，家謙請嚟自己人生睇嘅首個紅館騷歌手——天后Kelly陳慧琳！Kelly特別感謝家謙寫咗《鳴謝你而不想說後悔》畀佢，繼續自稱六歲嘅家謙，興奮指當年係表姐帶佢去睇Kelly喺2002年舉行嘅《飛天舞會》演唱會！Kelly鬼馬笑話：「嘩！你六歲？咁係咪胎教嚟㗎？我要多謝林爸爸林媽媽！」仲讚埋家謙嘅表姐有taste添！
家謙指「360吊車」就係inspired by對方嘅飛天騷，令天后勁「葡萄」咁話：「我之前都想飛天㗎，不過紅館唔畀呀嘛！你好嘢喎，你飛到呀！」家謙即引用《神奇的糊塗魔藥》嘅歌詞幽默回應：「因為我無視道與理是與非非，繼續往天飛再去遁地！」點知被Kelly秒回K.O.：「一個傻更更的你！」引全場發笑！最後家謙揀咗Kelly首經典作《最愛演唱會》嚟合唱，即刻去片啦！
