【Viu】林家謙一連十場《White Summer》演唱會噚晚嚟到第七場，家謙喺Talk位時表示，自己save低一啲Haters嘅post，用作平衡心態，又表示有兩個原因，「其中一個係『留底擊傷你的石頭，從錯誤裡吸收』，呢個係《葡萄成熟時》嘅教悔。」而另一個原因則指Haters「係有必要存在」，「我不停睇一啲好正吹捧你，肚臍好靚.....唔係唔好 ，大家照可繼續追捧，但可能係平行時空之中，好多人係唔鍾意你，你見到啦，前排嘉賓影片下面，好多評語，林家謙好難聽呀咁，唔緊要好Welcome嘅！」
近日網上流傳唔同嘅嘉賓名單，有人甚至估家謙會請嚟白韻琴、陳展鵬、方伊琪，家燕媽媽等等。對此，家謙笑稱網上嘅嘉賓list都流流地。噚晚，家謙查實請咗Kiri T做嘉賓，兩人合唱《至少做一件離譜的事》後，家謙得戚笑話：「係咪估唔到！哈哈。」Kiri T笑道：「我自己都估唔到呀。收到你邀請消息時，即係諗我哋有淵源？」家謙回應：「其實有小小黑歷史嘅，哈哈，我嗰陣個樣好核突，個騷呢，我做完個騷之後，唔見咗個化妝袋，心諗死啦，我要買過晒化妝品？你記唔記得，我周圍搵人問有冇見過我個袋？」Kiri T笑稱 : 「我好似剩係答咗你『哈哈哈』三個字。」
繼而Kiri T拎出兩張6年前嘅《BRAND YOURSELF MUSIC PARTY》海報，一張係大合照，另一張則係家謙單人，兩人又齊齊擺出當年嘅甫士，Kiri T又即時提議，「不如你簽個名啦，海報送比現場觀眾！」佢哋越簽越開心，更連海報上陳蕾等簽名，再隨機送俾現場幸運兒，氣氛熱烈！
至於第五場，家謙請到Karen莫文蔚做嘉賓，更即場拎咗《全身莫文蔚》珍藏實體碟，獲Karen大讚：「真係識貨。」家謙突然笑道：「我諗住下隻碟都係咁影。」Karen聞言表示一定幫襯買《全身林家謙》，家謙笑稱：「你咁重口味，唔好啦？」家謙隨後即席請Karen喺唱片上簽名，更緊張提對方：「你唔好簽落個身體到！」隨後，家謙表示要同Karen唱出童年時期嘅「洗腦歌」《冷雨》，令歌迷聽出耳油！
