【Viu】Jeremy李駿傑嘅《RISE IN LOVE》簽唱會，之前受颱風影響延至
今日喺將軍澳順利舉行，Unicorns熱情不減，Jeremy獻唱三首新歌《Tie Me Now》、《沒有你的世界》同《滿》，現場氣氛炸裂呀！
Jeremy早前去完馬爾代夫叉電淨化自己，又同老Best Anson Lo去日本玩，佢劇透之後同趙增熹合作做完音樂會後，8號就30而立嘅駿哥，會喺6號同Unicorns一齊慶祝，佢今年想收嘅生日禮物，就係買張機票俾自己，10月佢又會同士多啤梨組再去泰國出席音樂節呀，真係飛完又飛呢！
講到睇完Edan演唱會，Jeremy大讚Edan越來越成熟同進步，仲坦言睇呢位兄弟演出會諗：「究竟佢個腦裝啲乜嘢呢？點解佢會咁叻嘅？」對於小如豬被網暴，暖男Jeremy話明白大家有言論自由，但都希望大家保持多啲愛與支持，少啲負面聲音，佢話：「我自己第一次九展演唱會都震，佢好似淡定過我呀，我覺得佢好勁。」佢覺得Edan作為阿哥保護阿妹好正常，仲話：「我都想保護佢！」
Jeremy日前亦有特登睇姜濤喺澳門演出嘅直播，對於佢有揀唱MIRROR嘅歌，包括自己首《半》感到好開心，仲話：「佢肯用咁大咁珍貴嘅舞台Share俾我哋，feel到佢嘅愛！」仲話姜練習時有俾片佢睇，爆姜特登練到自己好攰然後先唱佢首歌，咁樣嚟練習，好認真好勁！
至於公司人事變動，Jermey大讚新CEO金廣誠一直有幫佢哋爭取好多嘢，近日有一齊開會，承認有傾續約MakerVillie，過程順利，希望繼續合作。快啲睇片啦！
