【Viu】樂隊Zen為咗紀念出道30周年，今晚喺旺角麥花臣場館舉行首個音樂會 《Back To You Concert》，以《交織怒火》揭開序幕，仲播出95年喺天王黎明手上接過「叱咤樂壇生力軍組合金獎」嘅珍貴片段，主音黃和興其後以黃家駒金句「香港沒有樂壇，只有娛樂圈」嚟分享對樂壇嘅睇法。當鼓手關禮琛要獻唱Solo歌《舊地》時，原本安坐台下睇騷嘅Nice@Dear Jane即上台客串打鼓，勁有愛！
當Zen唱到《古惑仔》主題曲《興波作浪》時，全場High爆。Encore時，黃和興邊唱《I Remember You》邊行上觀眾席冧Fans，當觀眾叫佢再唱時，仲爆Seed話：「X！咪唱咗囉！」笑爆全場！其後佢公開感謝太太Happy促成今次演唱會，最後以《Z4》作結，仲同全場大合照添！
完騷後，Zen親解今次開騷原因，希望「明年今日」可以再見歌迷，又預告新歌《幾十歲的5星星》會同Dear Jane合作，仲笑言要以當年黎明改嘅名「Sen」做Dear Jane演唱會暖場嘉賓，甚至再爭新人獎！對於畀隊友公開催婚，鴻哥就直認有「婚數」喇！想知「Sen」嘅發展大計就睇足本訪問啦！
此外，Dear Jane除咗Nice嚟幫手打鼓外，成員Tim同Jackal都有嚟捧場，仲有一踏入農曆七月就見到潘紹聰、挺住孕肚嘅戴夢夢、吳浩康同太太郭思琳亦係座上客！
