【Viu】林家謙紅館個唱第二場請嚟JACE陳凱詠做嘉賓，當JACE喺禮物盒出場嗰刻，全場尖叫聲不斷！講到JACE，就要數返家謙3年前嘅首個紅館騷Summer Blues，當時因為同JACE夾唔到期，所以最後只係可以預錄「合唱」，今次終於請到真人現身，難怪台下嘅CLS咁high啦！
二人先係合唱《四月物語》，而第二首合唱歌就當然係《隔離》啦！JACE喺台上嘅幽默對話揭露被「臨時急召」嘅內幕，當場引發「大型算帳現場」，令全場爆笑！JACE一嚟就玩「投訴」：「好驚呀！第一次做你嘉賓，可唔可以咁講，但邊個臨時臨急，得一個禮拜通知我做嘉賓？一個禮拜通知都冇！搞到我鬼死咁緊張！」點知家謙神回：「呢單嘢唔係我跟開！」即場表演如何一嘢卸膊，勁抵死！
點知JACE仲未諗住放過家謙，繼續翻舊帳：「你成日搵得我好急㗎！《四月物語》嗰啲，都係突然間....！」家謙即感謝：「係喎！要多謝你做我《四月物語》MV主角，搞到view數高咗！」JACE打蛇隨棍上，向家謙提供「還債」方法，就係做返佢下首歌嘅MV男主角，面對群眾壓力嘅家謙又應唔應承？
另外，家謙又大膽畀comment話JACE首新歌《大車 BIG CARS》啲詞一般，而首歌嘅填詞人正正係老best Serrini，呢晚樹妮妮都有嚟捧場，唔怪之得家謙專登咁潤佢啦！嚟睇騷嘅藝人們仲包括有蔡一智、方皓玟、雲浩影、Gareth.T、雷同二友及俞琤等！
