【Viu】G.E.M.鄧紫棋喺啟德主場館舉行一連五場嘅《I AM GLORIA世界巡迴演唱會2.0香港站》，噚晚演出圓滿結束。佢表示嚟到尾場，除咗係今次巡唱嘅第五場，之前亦無歌手喺呢個場館舉行過五場騷，呢晚大家共同寫下新歷史。唱畢《孤獨》後，G.E.M.有感而發指，首場髮型師嘅朋友帶咗12歲囡囡睇騷，而呢位小朋友本身有情緒問題，但睇完首場後感覺到力量，主動要求媽咪帶佢嚟睇尾場，G.E.M.感慨稱細個會追求歌藝進步、跳舞越來越好，但家陣人生到咗34歲，最令自己搵到意義嘅就係好似嗰位小妹妹一樣，「我覺得企喺台上最重要係，唔係要有幾勁、幾好，而係我哋之間互相影響。我嘅音樂可鼓勵到你，或者我需要鼓勵時，你哋又鼓勵到我。希望大家睇完我嘅演唱會，可帶啲力量返去生活之中，每日都開心平安，呢樣係我最開心嘅。」
經歷咗一年零九個月巡唱嘅G.E.M.表示，人生總會有新挑戰，噚晚喺出場前突然氣喘，佢都堅持繼續唱，希望自己嘅音樂可鼓勵到大家。佢又稱：「單係巡唱就經歷好多，試過遇到行雷閃電、大雨、耳機冇聲、有蟲爬上來等等狀況，雖然我覺得自己巡演經驗幾多，但因為大部份做體育場演唱會，亦係第一次，所以都會好驚。每一次喺呢個情況下都只可以強顏歡笑，因為唔可以停。我嘅巡唱就好似人生嘅縮影，無論發生咩事人生都要繼續。今日係第114場，當我面對懼怕時，我唔會再驚唔會再逃走。」G.E.M.忍唔住哽咽落淚話：「我好希望你哋如果遇到害怕、艱難時，心入面如果有焦慮，要同焦慮講：『你走呀！快樂係我哋嘅選擇。』」
尾場Encore環節，寵粉嘅G.E.M.增設點唱環節，清唱《回憶的沙漏》、《我的秘密》、《18》，多首歌滿足歌迷要求，並送上《海闊天空》，四萬觀眾跟住和唱，場面感人！最後以一首廣東話版嘅《天空沒有極限》，為香港站畫上完美難忘句號。
