【Viu】《全民造星VI》76位參賽者今日以夏日Look出席記者會，由11號Louis、21號牛牛、22號Alvin、31號三金、43號Ian同87號Winter組成嘅「抽褲男團」，以及5號Kirs、6號Gordon、14號Marcus、72號Jack Lo 、92號Bosco Kwan合組嘅「Phat Boy」分別喺水中勁舞，最後當然唔少得合體跳《前傳》啦，係青春呀！
身為「六朝元老」嘅花姐同KK謝家驥，坦言因為今年調低咗參賽者年齡下限，所以有未成年參賽者要格外小心照顧，好似湊仔一樣，花姐仲話見到年僅17歲嘅Bosco Kwan就好似見到自己嘅細仔一樣，又大讚19號Dave嘅自彈自唱有當年Ian嘅影子；KK亦大讚兩位有潛力衝擊冠軍寶座！KK又踢爆花姐為咗今日嘅演出，用力「關懷」一班仔仔；花姐即澄清大聲唔等於鬧，仲自爆今屆喊足咁多Round，係咪好想睇呢？
至於被選中表演嘅「抽褲男團」同「Phat Boy」直認緊張，又默認畀花姐「關懷」到喊，Phat Boy仲即席示範「花姐開心禱告」，笑死呀！
此外，6號Gordon、11號Louis、18號Kai榮膺網上人氣三甲；17號阿O、19號Dave同62號Lucas就係幕後心水！想了解各位參賽者更多就睇足本訪問啦！
