【Viu】終於等到「小巨肺」G.E.M.鄧紫棋返屋企-香港開騷啦！共5場《I AM GLORIA世界巡迴演唱會2.0》今晚喺啟德主場館開唱，G.E.M.仲專登揀喺生日周會香港fans添！
首場啟德騷比原定7點delay咗大約15分鐘開始，大螢幕先播出一條VCR，然後就見G.E.M.以女王姿態、騎住隻金碧輝煌嘅獅子霸氣登場，全場即大聲歡呼！然後G.E.M.帶嚟《摩天動物園》、《灰狼》，而喺佢打招呼前，G.E.M.先感受啟德主場4萬幾位fans嘅尖叫聲，再講到初出道唔敢想像喺紅館開騷，事隔多年可以喺啟德主場館開足5場，唱歌畀20多萬位fans聽，簡直係圓夢！佢又笑言聽日（16日）就係34歲正日生日，頭場嘅fans陪住佢倒數大一歲，並跟返開騷「傳統」同fans舉杯cheers！
去到Part 2，G.E.M.感性謂每次唱返起啲舊歌，都會諗返起當時嘅心情、狀況，講講吓佢仲忍唔住爆喊，台下fans紛紛安慰！去到個唱中段，G.E.M.帶嚟一段經典歌Medley，全場大合唱《睡公主》、《A.I.N.Y.》、《Where Did U Go》等，每首歌都係回憶殺呀！唱到《All About U》，G.E.M.上咗架鑽石飛碟，同場後嘅fans互動，係愛呀！
G.E.M.自爆為咗香港站專登錄過晒啲短片VO，確實係寵粉無誤！只得香港站獨有嘅仲有G.E.M.表演金魚嘴，呢次佢更加碼送埋飛吻，甜到漏呀！G.E.M.喺encore環節送上《天空沒有極限》，再飆高音驚艷全場，小巨肺世一！即刻睇實況片！
影片由觀眾提供
