【Viu】張繼聰同太太Kay謝安琪今晚齊齊出席音樂劇《大狀王》香港公演開幕酒會，阿聰話好榮幸可以演唱劇中最高難度嘅歌曲《撒一場白米》，仲話係人生中唱過最高真音嘅歌，雖然唔使「提肛」唱高音，但係錄音時都好崩潰。阿聰話稍後會為舞台劇做監製，本來口快快話要睇Kay表現先邀請佢演出，不過求生意識令佢立即改口，笑爆全場！
講到日前去澳門欣賞Eason巡唱尾場，仲有世紀合照，阿聰同Kay都唔Mind陳年緋聞被翻炒，阿聰仲話：「依家咪證明真金不怕紅爐火囉！大家都活到見到我哋三個人合照嘅年紀喇！」阿聰仲話當年曾經寫咗首歌係畀Eason同Kay合唱，結果因為嗰啲不堪嘅傳聞而擱置；Kay亦附和話如果當時推出合唱歌根本只會模糊焦點，啱呀！
講到Kay擔任Kelly個唱嘉賓被指演出失準，Kay眼濕濕直認有「紅館PTSD」，一落台已經好內疚，事後成個禮拜都唔敢出街，擔心途人嘅目光，好彩有阿聰教自己「運動就是力量」，希望可以克服呢個問題。
此外，現年76歲嘅徐小鳳激罕現身撐場，仲精靈揮手兼談笑風生；而早前邀請Kakaball參與《Lyman舞士道》嘅Lyman，亦帶同太太Zoe嚟捧場！快啲睇足本訪問啦！
