【Viu】Eason陳奕迅為《FEAR and DREAMS:NOW is the only reality》舉行一連四場首映，紀錄片中佢自揭患上焦慮症，需長期服藥控制病情。喺歌迷分享場，Eason自爆一直冇話俾媽咪知自己有情緒病，因為驚佢擔心，但醜婦終須見家翁，新聞一出，媽咪即打電話問點解咁大壓力，Eason表示：「其實我真係唔係好緊要，我個病係好輕微，唔係嚴重到行唔到出房門口嗰種。大家唔使好擔心。」
而Eason演唱會完結後，喺屋企冇嘢做，竟然會開始諗下次演唱會，「我直頭係諗不如開個大場，自己唔使咁辛苦，諗諗吓自己摑自己一巴，咩事呀，放假啦，你仲諗！」Eason堅持個唱有故事骨幹，希望之後去唔同地方睇騷，「睇騷真係好開心，好似我嗰日睇Big 4好開心，覺得許志安好有型，有衝動都練下自己肢體Fit啲。」
而第四場Eason則特別請咗一班圈中好友嚟觀看，包括容祖兒、梁漢文、馮德倫、許志安、蘇永康、Eric Kwok、葉佩雯、岑寧兒、谷德昭等等，現場星光熠熠！睇過紀錄片後，Joey表示睇完之後心情非常複雜，更稱好似睇緊鬼片一樣，「好緊張，直頭係身同感受。佢好似打咗一場仗，一個個難關去克服，佢經過今次後，應該冇嘢可以再嚇到佢。」
蘇永康表示Eason打網球受傷時，好擔心耳仔聽唔清，阿公就會安慰佢，「人生入面有好多fear，可能有啲問題唔可以即刻解決，就先放一邊，學習同問題共存，終有一日可以解決。 」梁漢文則稱Eason早期取消香港站，亦感受到佢嘅fear，「大家都係男人，我哋又唔會講咁多，見到佢去咁多地方，做咁長tour，戥佢好開心。」許志安坦言睇完紀錄片，自己個心都舒服唔少，「感受好深，鏡頭前都係好真實嘅佢，兩三年前，我都有fear嘅時候，佢寫咗首歌比我，我好佩服佢，佢生病過程當中，仍然可以咁強。」仲有Eric Kwok同岑寧兒嘅贈言，快啲睇片啦！
