【Viu】Eason陳奕迅《FEAR AND DREAMS 世界巡迴演唱會》澳門終站終極尾場，除咗Eason爸爸陳裘大外，老婆徐濠縈、囡囡「包包」陳康堤都到場力撐，兩母女企喺台邊嘅「搖滾區」欣賞Eason演出，更係隨住音樂喪搖擺身體，睇得勁投入！
個唱尾段及致謝環節，Eason先後感謝樂手、團隊，最後再次感謝阿徐同包包，然後笑言再講就尷尬，又叫大家唔好望佢哋！之後Eason仲特別多謝經理人甘菁菁，指知道有好多人鬧佢，man爆為經理人護航：「咁叻，你做呀！」型呀！
緊接直落快歌Medley，Eason出盡奶力跳唱，仲可以邊跳邊飆高音！唱到《超人的主題曲》、《打得火熱》、《重口味》氣氛更high，感染音樂總監Jerald跑埋出嚟一齊跳唱，而Eason更被dancers舉起兼喺空中旋轉360度！尾場fans超熱情，跟住Eason跳足成part！
話晒都係終站尾場，點會咁易畀fans走？直接去encore部份！換上便服嘅Eason上台後即唱《K歌之王》，令全場fans超high！成個encore賣大包唱足11首歌，Eason都仲未覺攰，落返台冇幾耐就連人帶結他升返上嚟，二度encore！Eason話一直都唔知最後一首歌係唱邊首，最後佢決定揀，送返個驚喜畀fans！最終終站尾場唱足4粒鐘，182場世巡就咁圓滿結束！完場後Eason突現身後台會傳媒，舉起雙V興奮大叫完成！
