【Viu】BIG FOUR事隔12年再開三場紅館騷，今晚頭場甫開騷，四子依次序許志安、「阿公」蘇永康、Edmond梁漢文、Dicky張衛健逐個出場清唱各自嘅首本名曲，《愛你》、《那誰》、《衣櫃裡的男人》及《足球小將》！當中以「大師兄」Dicky用哭腔唱慢版《足球小將》最抵死，引全場爆笑！
隨後加埋超過200歲嘅四子再帶嚟快歌medley炒氣氛，包括：《喜歡妳是妳》、《有人喜歡藍》、《披頭四》、《真真假假》，期間佢哋分組去到台兩側嘅天橋接近fans，握手、自拍來者不拒，最後再合唱團歌《Big Four》，頭part就已經勁high！
之後四子同fans打招呼，講講吓變咗個棟篤笑咁，安仔、阿公、Edmond夾埋係咁「欺負」大佬Dicky，一時笑佢唔夠高、一時又笑佢成日唔記得歌詞，更率領全場觀眾叫Dicky「找數」表演蜈蚣彈，堅係迫到大佬就範？今年60歲Dicky忍唔住拎張樂悠咭出嚟，以為咁就冇事？就梗係唔係啦，三位細佬玩得更起勁，就連Dicky無仔送終都拎出上台講！Dicky點高EQ反擊？
Edmond老婆林文慧、阿公老婆馮翠珊同囝囝Jazz、林家棟、郭啟華、劉浩龍、杜如風等現身撐場！另外，安仔父母、張學友、郭富城、劉德華、謝霆鋒、汪明荃、羅家英、張繼聰、謝安琪、林峯、張敬軒、陳慧琳、蔡卓妍、陳慧嫻、方力申、陳小春、李克勤夫婦、胡楓等送花籃support！即刻去片睇實況！
