【Now.com】憑《全民造星III》突圍而出的「仙氣女神」雲浩影（Cloud）一連兩場「Finding Cloud雲浩影演唱會2025」，昨晚（3號）在旺角麥花臣場館完美落幕，全場爆滿。Cloud不僅自彈自唱仙氣爆燈，還突破形象以短裙黑絲大跳辣舞，全場哄動。Cloud更連續兩晚都被觀眾的熱情感動到喊，高呼：「我好愛你哋呀！」
寰亞老闆林建岳、男友T-Ma及好友馮允謙等均到場支持，可見其圈中人緣。演唱會以「小小Cloud」寫給長大後自己的一封信作開場，身穿淡綠色長裙的Cloud仙氣登場，以鋼琴自彈自唱經典英文歌《Moon River》揭開序幕。緊接獻唱第一首派台歌《願望之翼》時，舞台大屏幕為Cloud添上一雙閃閃發光的翅膀。Cloud感性地說：「我好多謝音樂令我認識大家，而我由細到大唔多朋友，可能性格比較『摺』（內向），未試過搞生日會，但今日第一次有呢個party同大家一齊去玩，好開心！」
之後Cloud一口氣演唱《無以名狀的痛》、《慢性分手》、《引我笑》和《密切接觸者》等「疼痛」系列作品。自彈自唱《Singalongsong》後畫風一轉，演唱一系列快歌，隨後更換上吊帶短裙配黑絲，與男Dancer大跳辣身舞，演唱《I Love You 3000》，全場哄動。她對觀眾笑說：「係咪好正呢？係咪比噚晚更加正呢？因為今晚爹哋無嚟睇！」
首晚演出中，當Cloud唱《你在我不遠處》時，被全場手機燈海感動得掩面落淚，高呼：「我好愛你哋呀！」；至昨晚第二場，她誓言：「今晚我唔會喊架啦，你哋咪試吓囉！」結果唱到最後一首歌《別畏高》時失守，Cloud睇見全場觀眾站起來高舉打氣手幅，忍不住熱淚盈眶，說：「我唔捨得你哋，可唔可以下次再見呀？」最後鞠躬和飛吻謝幕。
總結兩場演唱會，Cloud說：「兩晚帶畀我嘅感覺好唔同，包括我個人狀態和觀眾反應，第一晚好似同大家開party，尤其是當我自彈自唱《Singalongsong》時，大家反應好熱烈。而我好用力唱慢歌時，觀眾亦好投入。」問及為何以三封給自己的信連繫整個演唱會？Cloud說：「我冇寫日記習慣，但想喺第一個演唱會，用文字寫啲嘢畀自己。我會諗，到底以前嘅自己，諗到我依家開騷會唔會好自豪、好驕傲呢？所以就代替以前嘅自己，寫信畀依家嘅自己。」
演唱會後，Cloud都與每晚的VIP觀眾1對1合照，各式比心姿勢有求必應。她坦言：「我知道自己台上表現仲有好多進步空間。好開心完成咗兩場演唱會，亦好開心見到台下觀眾，每一張開心臉孔。合照時每一位同我講鼓勵嘅說話，甚至有人話第一次睇嘅演唱會就畀咗我啦。呢啲對於我都係好珍貴嘅moment （時刻）。」Cloud又以電影《香港四徑大步走》的背景比喻自身狀態：「我覺得我依家係Survivor（生還者），向『完成者』（Finisher）努力，希望將來更多機會和實戰經驗，到時會有『雲浩影3.0』送畀大家。」
