【Viu】Kelly噚晚完成第10場《陳慧琳Season 2萬人結界演唱會》，尾場驚喜連連，Stephen馮德倫孖Mark雷頌德嘅組合Dry世紀合體，夥Kelly、豹哥單立文、Joey Tang合唱《紀念日》，回憶呀！Mark笑稱：「證明呢個世界有平行時空，隔咗咁多年我同Stephen鬚都白埋，但中間嗰個（Kelly）依然冇變。」Stephen又爆俾Mark「水」嚟做嘉賓：「我前晚係諗住問阿Mark出唔出嚟飲咖啡？結果佢淨係叫我嚟做嘢，冇覆我飲唔飲咖啡。」
台下歌迷即高呼叫二人多啲合體，Mark又爆Seed：「我退咗休喇！如果我哋以前咁受歡迎就唔使解散啦！我哋嗰時好多嘢做，但冇賺過錢，因為冇商演。賺得最多係Fans送嘅公仔。」豹哥即笑言：「你哋叫Dry梗係冇錢啦！」Kelly又補充話：「網民話你哋年紀大咗，可以叫Dry Martini。」Stephen就話：「咁我咪要叫Stephen Yoshi，會型啲！」Kelly立即指住Stephen心口：「人哋露點㗎！冇露就唔係Yoshi。」聽到Mark口啞啞問：「Yoshi咩嚟？我唔識。我真係退出咗！」Stephen即笑老Best：「你返去玩馬啦！我仲係好Trendy。」想笑C？就入嚟睇現場實況片啦！
