【Viu】Tyson Yoshi同老婆仔Christy正喺意大利舉行夢幻婚禮，繼Day 1嘅Welcome Dinner後，終於嚟到戲肉Wedding之日！亦繼續有一眾星級小編軒公、Serrini、Jeffrey、Gareth. T、Locker、婁峻碩、焦凡凡、MADBOII、派偉俊等，兼專業幕後功臣s為大家直擊超感動嘅行禮moment，真係要講聲Grazie（意大利文謝謝）！
只見Tyson收起對big爆胸肌，打晒煲呔、西裝骨骨，chok爆單拖行入會場花園！之後就見着low cut婚紗嘅Christy拎住花、翹實爸爸慢慢進場，呢個時候鏡頭一轉就見Tyson眼已濕，又雙手疊實兼深呼吸，睇嚟心情好激動！然後一對新人喺眾嘉賓起哄之下多次錫錫，極之sweet！
成功娶得美人歸嘅程生喺儀式後拖實程太，最後接受兩旁嘉賓s嘅祝福離開行禮場地以完成儀式！就喺上樓梯嗰陣，Tyson突然中二病「發作」，停低回望嘉賓s總統式揮手，超得戚勁爆笑！
到晚飯時間，眾嘉賓去到露天用餐場地，分成幾張長枱，不時見軒公幫手打點，所以喺致謝環節，Tyson特別點名感謝呢位「屋企人」！換上低胸兼露美背白色晚裝裙嘅新娘子Christy，就同老公仔Tyson逐枱敬酒，突見唔煙唔酒嘅Tyson竟然拎起枝Vodka直接隊，後尾聽到佢自爆係水嚟嘅，仲諗住佢為婚禮破戒添！Tyson同Christy又搞笑以汽水代酒進行斟「酒」儀式，兼喺煙火setting前切結婚蛋糕！
直落仲有party，難得見Tyson舞王「上身」同Christy共舞，一跳完就勁怕醜，交由軒公接手繼續跳！之後眾人轉戰室內「busking」，軒公一嚟就送上一小段「棟篤笑」娛賓，跟住仲以鋼琴自彈自唱經典情歌《Lovin’ You》，企隔離幫手拎咪嘅Christy聽到超陶醉呀！另外，有報道指Christy肚凸凸疑似雙喜臨門，Christy即時澄清話只係tummy嚟啫！即刻去片睇婚禮現場花絮！
