【Viu】「教主」Anson Lo盧瀚霆聽日就30歲生日啦，歌迷會今晚以「Together We Celebrate」做主題搞咗個生日Party，有5000名神徒為教主慶祝三十而立，阿撈感觸話：「你成日聽人講29+1，其實可以直接講30，我係唔介意嘅！係呀，我今年30歲啦，除咗越嚟越Man啦，我覺得都係一個轉捩點，一啲以往嘅遺憾、挫敗都擺埋一邊，要勇往直前先！」
寵粉嘅阿撈先同Fans玩兩個鐘遊戲熱身，之後坐上粉紅色花車繞場，並獻唱《不可愛教主》、《Hey Hey OK!》、同埋《你都有今日》，粉絲們High爆！歌迷會今年事先送咗一張按摩椅俾阿撈，希望佢身體健康。而早排做完手術嘅阿撈亦分享康復進度已好返9成，仲話自己家陣作息穩定、飲食均衡，會好好照顧自己。現場播出世界各地嘅神徒祝賀短片，同埋阿撈歷年精彩舞台畫面，睇到壽星仔眼濕濕。
阿撈又獲送一個精美大蛋糕，蛋糕周圍佈滿粉紅色燈，寓意神徒嘅粉紅海互相照耀，亦會繼續陪伴阿撈走遍世界各地唔同嘅舞台，而「劇透撈」更向驚喜向神徒表示今年12月初會開個唱，令全場熱烈歡呼！神徒隨後為壽星仔唱生日歌 ，阿撈許願望大家身體健康、開心快樂，「見到好開心嘅神徒同我繼續一齊行落去。」佢又感觸話：「我愛你哋每一位，你哋每一位都同樣重要。」隨後90度鞠躬多謝粉絲，仲興奮到紮紮跳，舉機同神徒們影大合照添！
阿撈事後受訪表示，正日生日要去School tour，夜晚就會同家人慶祝。講到「教姐」噚日帶愛寵Amber參加慈善步行，阿撈表示好了解Amber嘅脾氣，「佢大部份時間都好興奮，加上佢好鍾意親近人，呢個慈善活動佢會好開心！」
講到噚晚音樂會MIRROR同Eason合唱，阿撈直言好似完成咗一個願望，「Eason前輩佢係超級熱情，即使一日之內見足我哋幾次，但每次佢都會同我哋全隊逐個人擊掌。」佢仲表示12子都勁興奮，又大爆Jer最興奮，返到後台都未冷靜！
