【Viu】郭富城同許恩怡（Natalie）今日為新片《無名指》優先場驚喜謝票，適逢父親節，年屆59歲的城城即席報喜，將會三度榮升嗲哋，雖然避談「三寶」性別，但城城就話兩個囡囡「大寶」同「二寶」都好開心，自己同太太方媛都多謝上天恩賜，而自己亦一直鍾意熱鬧嘅大家庭！向來緊貼新聞嘅城城，仲恭喜埋方力申首次做嗲哋，一齊分享快樂！
講到首次同「星二代」Natalie合作，城城就大讚佢承傳咗靚媽柏安妮嘅美貌，而且相當聰明，可以應付高難度角色！而Natalie就大讚城城好玩，仲主動要求重拍，等自己可以表演得更好，但就爆男神為咗keep fit拒絕自己，係咪好想知呢？出道短短日子，已經同咗劉德華、城城、鄭伊健等男神合作，Natalie原來超有大志，想集齊「四大天王」威畀媽咪睇噃！想一齊分享城城嘅喜悅，記得睇足本訪問喇！
