【Viu】ViuTV大型選秀節目《全民造星VI》今日舉行記者會，由於33號參賽者未能出席、39號參賽者退賽，共97位參賽者首次見傳媒，席間21號周德誠（牛牛）31號榮柏鑫（三金）、43號陳瑨羲（Ian）成為「互選三甲」，佢哋坦言喜出望外，既有壓力亦係動力！Ian透露曾榮膺《造星III》季軍嘅哥哥ANSONBEAN有畀意見，仲澄清返哥哥「斷網」只係想重整身心健康，整理好後就會出返嚟見大家，唔使擔心！
至於36號黃文衍（MW）、49號杜曦俊（Larry）、24號杜言朗其實係半個圈中人，MW喺MakerVille做經理人，但唔驚有利益衝突，因為製作組做足保密功夫，唔會「放水」。曾經拍過ViuTV劇同演過舞台劇《Di-Dar》嘅Larry，亦認為就算識阿祖都冇著數。而24號朗朗就係前亞視小生杜挺豪囝囝，佢話爸爸支持自己獨自由外國返港參賽，仲教佢點樣「行走江湖」添噃！
此外，73號陳頴業係陳葦璇男友，雖然年屆40歲，但唔驚輸蝕，亦冇打算睇齊女友拎獎。14號林焯彥（Marcus）同61號李樂天（Air）係年紀最細嘅參賽者，只得17歲，佢哋笑言錄影比返學優先，家人同學校都支持參賽。而91號嘅翟俊威（Aden）係人夫兼人父，因為兩歲囡囡想喺電視見到自己而參加，希望成為娛樂圈中第一個「爸爸Idol」！
