【Viu】林峯一連七場紅館騷《GO WITH THE FLOW 林峯演唱會》今晚開鑼！染咗一頭白髮嘅阿峯，着住件白色長褸喺蛋糕形舞台中升上嚟，打頭陣就唱《愛在記憶中找你》，開啟萬人K房mode！期間阿峯除低耳機接受全場尖叫聲，仲大叫問大家：「Are you ready？」全場high爆呀！
騷前阿峯透露呢個騷會由頭跳到尾，果然喺接唱第二首《Not Done with you》嗰陣，阿峯行到台邊除低件白色長褸，大露一對麒麟臂，擰轉身仲送埋背肌添！阿峯更邊跳邊咬唇兼放電，好hot呀媽咪！接住唱埋《CHOK》，chok峯正式上線！演唱會都只係啱啱開始，但已經放晒煙花同玩爆破，阿峯堅係屈機！
另外，「十二少」胡子彤孖陳苡臻、張蔓莎、黃梓僑現身撐「陳洛軍」！至於「陳占」郭富城、「秋哥」任賢齊、「信一」劉俊謙、蔡思韵、鄭伊健、草蜢、謝天華、「家姐」宣萱、謝霆鋒、張敬軒、吳君如、古巨基、容祖兒、蔡卓妍、吳卓羲、何超蓮等則送上花籃賀阿峯開騷！快啲去睇實況片，超精彩！
