【Viu】由劉德華監製及演出嘅電影《獵金·遊戲》今日喺觀塘商場舉行首映禮，吸引唔少「劉太」嚟撐場，當華仔孖「Kent哥」鄭則士、導演邱禮濤進場嗰陣更傳嚟陣陣嘅尖叫聲！華仔話聽見咁多位「劉太」叫佢做「老公」都好冧豬，但就抵死講明冇家用派㗎喎！
講到佢哋喺戲中炒股咁叻，喺現實生活中都係咁耍家？華仔謙稱完全唔識㗎，有資金嘅話就係用嚟積穀防饑、或者用嚟買磚頭、拍戲，即被Kent笑話要好多房先裝得晒啲穀，會唔會太好笑！至於講到73歲Kent哥喺北京首映嗰陣話做人要學華仔，就輪到華仔整蠱返Kent哥，笑問：「仲想生呀？」Kent哥又點「反擊」？
電影最後以國語呈現，又有冇諗過配返廣東話？早前華仔喺訪問笑談12歲囡囡劉向蕙「炫父」冇人信，華仔話其實佢都係講吓笑啫，而平時都有陪囡囡參加學校活動嘅！母親節將至，華仔話一如以往會陪媽咪食飯！另外，王晶近日喺網上大談華仔嘅情史、又話朱麗蒨做劉太好辛苦等，想知華仔點回應？咁就要睇足本訪問啦！
