【Viu】姜濤生日快樂！《Keung To Birthday Treasure Hunt 2025 & The Keung’s Show》今日喺西九文化區舉行，除咗10米高嘅巨型吹氣小濤濤吸引一眾姜家人打卡外，重點環節當然係姜Admin現身《The Keung’s Show》，同6千名姜家人齊齊慶生，FC今年仲專誠邀請同姜濤合作無間嘅台灣跳舞老師大目老師同團隊嚟香港做暖場表演，令姜Admin驚訝到O晒嘴，仲笑住叫台灣嘅朋友記得要去銅鑼灣睇吓，又即席跳咗一Part《白果》，開心指數滿分呀！
期間姜濤同Fans玩默契大考驗，齊齊擺Pose，又爆笑分享自己喺維園都係用「胯下射波」，認真鬼馬！除咗考默契，姜糖仲可以鬥快打電話畀姜濤，其中一名幸運兒竟然都係4月30號生日，超有緣呀！
生日會當然唔少得大合唱生日歌同切蛋糕環節，全場Fans仲高舉顏色牌，拼出巨型生日快樂拼圖，令姜Admin嘩然，大讚姜糖一年比一年勁。其後FC送上紅色咪畀偶像做生日禮物，姜濤話呢支係人生中第一支私家咪，以後都會用呢支咪嚟唱更多好歌，隨即送上《一首簡單的歌》，寄語大家要做一個平凡而深刻嘅人，亦再三呼籲Fans唔好將姜濤放喺第一位，而係要更加愛錫自己，將自己放喺首位，超Sweet呀！快啲睇現場實況啦！
