【2025年4月23日】仲有一個禮拜就係「430姜濤誕」嘅大日子喇！FC將於24至27號喺西九文化區舉行「The Keung’s Galleria」姜濤2025生日慈善應援展覽，今日開放傳媒預覽，等小編帶大家率先直擊「8大主題打卡位」，包括「型格工業風」、「浪漫飄雪」、「溫暖家居」、「快樂王子」、「哈哈笑顏」、「花花世界」、「17胎回憶」同埋「生日應援寫真製作花絮」，由室內玩到室外，超吸睛呀！
現場除咗有姜Admin首次為生日應援專誠拍攝嘅靚仔相同服飾外，仲有喺澳門《NBA傳奇名人賽》同埋《生啤盃》嘅波衫同獎項，巧珍貴㗎！
FC仲喺文案分享「鐵線皇冠」意義非凡：「鐵線係生活中常見但用途極廣嘅物料，象徵人間智慧同韌性，就好似姜糖同姜濤之間嘅關係，係一雙手同一顆心建立出來嘅獨特羈絆。」而每位買飛入場嘅觀眾都可以獲得後援會限定官方紀念品，同姜濤一樣靚到令人心心眼呀！
