【Viu】現年74歲、有金牌經理人之稱嘅Paco黃柏高，最近接受商台《星光背後》主持梁泰來訪問，講到抗癌10個月嘅歷程，佢坦承喺2019年7月發現病徵：「嗰時好惡劣，咳得好緊要，痰又帶血。以前我飲酒，一個星期飲醉八晚，成日以為醒唔到，到發覺出現問題，先發覺真係會死。當時驚㗎！我諗住玩完，但都要接受。我覺得係自己攞嚟，之前實在太瘋狂。」
Paco接受咗化療、電療，佢形容係辛苦到好難形容，佢指而家仍然要定期檢查、唔敢再飲酒：「以前我認為酒係生命之水，帶畀我無窮作戰能力，但而家先知，真正生水係清水。」Paco知道最壞情況都係醒唔到：「最緊要面對現實，解決問題，克服困難係要堅持，況且我仲有目標，仲想做音樂同拍電影。」佢喺大病過後注重健康，會喺夜晚7點瞓、減少應酬。
回望返Paco喺2012年加盟太陽娛樂，之後經歷薛凱琪等先後離巢，有傳佢因為失勢而被安排專注電影發展，佢回應：「係時代唔同咗，當時無辦法，要集中做電影，要全心全意，唔係想像中咁易，係難以兼顧，作為經理人，我都疏忽，可以咁講我兼顧唔到咁多問題。」深明娛圈人情冷暖嘅佢，對於有藝人喺佢低潮時保持距離，佢直言唔會唔開心：「因為我都係咁！我都會見利忘義嘛！不過大家睇唔到啫！」
