【Viu】一向鍾意小朋友嘅姜濤，呢日去到跑馬地馬場出席香港麥當勞舉辦嘅「第16屆麥當勞兒童愛心馬拉松2025」。今年係姜濤第三年擔任「香港麥當勞叔叔之家慈善大使」，佢希望繼續宣揚「小朋友幫助小朋友」嘅精神，今屆馬拉松成功吸引咗近6,000名大小健兒報名，為咗做善事，大人細路都活力十足！喺2024年，「香港麥當勞叔叔之家」一共籌到超過1,400萬的善款，為歷年最高籌款額。而截至2024年，香港麥當勞已為慈善基金累積籌得成9,500萬港元善款，可喜可賀。適逢香港麥當勞成立50周年，可以同姜糖們一齊喺歡笑中傳遞愛心，姜濤都覺得別具紀念意義啊！
另外，姜濤從小就同麥當勞結下深厚緣份，佢自爆小學試過喺麥當勞俾姜媽讚同埋打，中學曾喺店內補習數學，之後又喺跑馬地分店做Part time返通宵更，到家陣擔任麥當勞叔叔之家慈善大使，人生每個階段都有麥當勞陪伴，見證住自己成長呀。
