【Viu】今晚喺中環有場品牌event，請嚟兩位巨星現身造勢，講緊嘅就係台灣天王周杰倫、韓國女神韓韶禧，吸引過百fans到場舉牌應援，場面爆墟冚！
戴住黑超、全身黑look打扮嘅周董喺fans嘅尖叫聲下chok爆進場，現場聽到唔少fans大嗌「杰倫」，周董極寵粉喪揮手打招呼，就連二樓嘅fans都照顧埋，真係超貼心呀！
正進行世巡嘅周董，嚟緊6月就會唱到嚟香港，佢話好期待喺新場啟德開騷，仲指知道謝霆鋒、JJ林俊傑、五月天會畀佢先唱，所以到時都會問吓佢哋感覺如何，再睇吓揀邊首歌唱爆啟德！每次周董開騷定必一票難求，本尊亦話收到fans request加場，咁唔知周董會唔會應fans意願take action？
日前周董喺IG晒同林志穎出席上海F1賽車公開活動嘅靚相，更幽默引用電影《頭文字D》嘅台詞：「我是藤原拓海，我想加入你的車隊！」咁唔知周董係咪堅會加入賽車行列呢？
女神韓韶禧以一襲黑色修身長裙亮相，配襯白裏透紅嘅肌膚，氣質滿滿，真係睇見都心心眼！女神進場嗰陣同場邊行邊揮手，更出大絕送埋飛吻、派心心，要冧暈全場fans對佢絕對零難度！惟女神並未有受訪，聽唔到佢把靚聲係爭咗少少，但韓韶禧都企定超過2分鐘畀傳媒捕捉佢個靚樣，nice到爆！快啲去睇片啦！
