【Viu】ViuTV大型選秀節目《全民造星VI》今日公布導師名單，就係做過兩屆導師嘅梁祖堯，加曾出任《造星》評判嘅Gin Lee李幸倪！經過5日嘅海選，Gin Lee笑話有in到靈魂出竅嘅感覺，咁唔知佢同阿祖着重睇參賽者邊部分？講評語嗰陣又會唔會好mean、好嚴厲？聽到花姐自爆忍唔住講粗口兼見靚仔會姨母笑，阿祖加碼踢爆花姐有爆喊，究竟發生了甚麼事？
阿祖同Gin Lee透露之後每round都會再請外援幫手，至於會搵邊個？佢哋就大賣關子啦！兩位喺過往都有做導師嘅經驗，自言每次去到foul人階段就寧舍心痛，所以今次佢哋特別向花姐request唔再做「劊子手」，呢個「革命」成唔成功？
Gin Lee近日同愛徒Gigi炎明熹飯聚，透露對方依家重心放喺學業上，但會唔會覺得Gigi因合約令星途開天窗會好蝕？另外，阿祖憑舞台劇《Di-Dar》入圍第33屆香港舞台劇獎嘅「最佳導演」、「最佳男主角（喜劇/鬧劇）」，佢又有冇信心攞獎？睇兩位導師嘅足本訪問同時，送上今日海選現場嘅實況，即刻去片！
