【Viu】ViuTV大型選秀節目《全民造星VI》嚟啦！節目總顧問花姐今日孖主持強尼、音樂總監徐浩現身海選現場，同場宣布梁祖堯、Gin Lee為導師，隨後其中12位參賽者更逐一亮相！
講到花姐出山再現《造星》，佢話對節目有情意結，即使上幾屆冇做都會留意，加上佢沾沾自稱節目會因為有佢本尊參與而更好睇！6度做MC嘅強尼笑稱仲係好緊張，又預告今屆班底陣容鼎盛，所以都好期待！
為期8日嘅海選去到今日第5日，花姐話冇諗過total會收到過千份報名表！談及今屆年齡降低至16歲，吸引唔少未成年嘅追夢者，花姐指有好多仲細過佢兩個仔，咁點解唔叫兩位公子參加呀？佢又笑話喺開始海選前有專登控制自己唔好講粗口，但唔夠10分鐘就破功啦！但同時花姐自爆見到某啲參賽者會露出姨母笑表情，真係好想睇呀！強尼則透露有repeater嚟再參選，當中更驚現首屆《造星》仔仔添！
MIRROR嚟緊將有唔少演唱會、團綜，花姐又點分身？另外，出身《造星》嘅阿Dee@ERROR近日榮升兩個單位嘅業主，佢哋都笑話造星仔仔的確係有啲本事，搞到花姐都心郁郁睇樓想搬，擔唔擔心「樓奴」阿Dee供唔嚟？
而今日亮相嘅12位參賽者中，楊皓軒、陳曉希年紀最細，分別係17同16歲，同為Form 5學生，佢哋又有咩一技之長？優勝之處？面試嗰陣有冇被花姐mean親？又點樣準備下年嘅DSE？即刻去睇足本訪問片啦！
