【Viu】 方力申今日同歐鎧淳及曹星如一齊出席「揹水一戰 2025」起步禮，婚後首次現身公開場合嘅小方，已經係愛妻號，佢話冇叫太太Maple葉萱嚟參加，驚佢應付唔到，亦冇叫佢喺終點等，星期日要俾太太瞓到自然醒喎，而小方自己就第7次行，睇住呢個活動搞咗十年，覺得好感觸，不過佢冇練過就要孭住水行15公里，笑言唔係好期待！
講到新婚生活，小方甜住話最唔慣係要改口叫女友做老婆，亦唔慣俾人叫老公，感覺好似好老咁！咁其實佢點會咁鬼馬，帶老婆去美國求婚仲就地結埋婚呢？小方話當知道二月要喺拉斯維加斯有活動，佢就已經有計劃，阿媽都知嘅，本身又有朋友喺洛杉磯可以幫手安排，都籌備咗成兩個月，老婆當然好surprise，不過其實佢都冇把握可以即日結埋婚！
小方仲話幫襯林夏薇買求婚戒指，襯老婆瞓覺偷偷用橡筋度佢手指Size，度完薇薇話size無理由係咁，卒之要偷影手指相嚟目測對比，小方話結婚戒指會再換，同埋太太一齊再揀過！至於結婚行禮，佢話真係好感動，發覺男兒膝下有黃金，一跪底講深情說話，情緒就嚟，講結婚講誓詞都眼濕濕，兩個都喊晒！落機返到屋企然係同家人食飯，亦有補返斟茶俾家長，阿方老爺第一次聽新抱叫爸爸，十年嚟都冇笑得咁開心，而方媽媽就由小方拍拖開始就當Maple係女咁！但佢哋唔打算喺香港擺酒，驚請漏人喎！至於生小朋友，小方坦白係有計劃，好多朋友都介紹中醫話包生仔，不過佢會揀順其自然，生仔生女都ok！
