【Viu】早前宣佈離巢嘅Kaman江嘉敏今日去咗又一城出席活動，現場聽完 鋼琴家 Maksim音樂分享，即話好有衝動想買返部三角琴返屋企玩，佢以前都有彈琴，只係工作忙冇練啫！講到識樂器嘅男仔係咪會加分？Kaman話當然會，佢早前識咗個男仔拉小提琴好厲害，仲話想同Kaman jam下，嚟個小提琴同 鋼琴合奏添！Kaman話打從心底為呢個男仔加分，咁係咪有機發展？佢話多咗話題，不過仲係朋友啫！
講到今日係離巢後首個出席嘅活動，Kaman話最開心係第一次出席有關鋼琴嘅活動，但就遺憾冇得同Maksim合奏！而家接工作全部自己話事，Kaman覺得有少少辛苦，過去9年都係被照顧得好好，而家咩都要自己處理一腳踢，都覺得得意嘅，辛苦得嚟都享受嘅，諗住應付唔嚟先搵人照顧囉！身邊都有朋友叫佢唔好咁辛苦，不過佢覺得搵公司合作係後話，現階段想試多啲唔同嘅可能性，自己要學多啲嘢，唔可以自己咩都唔知！
至於同舊公司關係，Kaman話開頭都有傾續約，傾咗好幾次，連人生問題都傾埋，不過最後同屋企人商量完後就決定唔續啦！Kaman話唔同階段想要嘅嘢都唔同，開頭二幾歲簽約想拍劇，三十歲想試啲唔同嘅可能性，譬如拍電影、廣告、舞台劇等，咁驚唔驚收入少咗？佢話而家著重嘅唔係收入幾多，而係想涉獵更多唔同範疇嘅嘢，學多啲嘢喎，想知就睇足本訪問啦！
