【Viu】創作歌手方大同於2月21號病逝，終年41歲，震驚各界。商台《星光背後》重播大同2019年回港舉行最後紅館騷前嘅個人專訪，紀念香港樂壇一代才子。
大同喺節目中講起成長、自學音樂，佢先後喺夏威夷、上海、及廣州生活，12歲時跟父母返港定居。佢因為細個睇過傳記電影《La Bamba》，所以立志以音樂做終生事業！佢分享話：「最初係鍾意唱歌，結他係10幾歲聽到blues開始自學。唱歌無人教過，只係一直唱。而我就係鍾意音樂，令自己把聲變成一種樂器。」
而大同喺2013年離開華納前已有創業念頭，為咗自由發展音樂事業，佢不顧一切咁去經營公司。佢自覺對物質或金錢上唔係好強求，只要維持到衣食住行就唔需要擔心太多，「其實所有事都係咁渺小，如果我八十歲嗰年睇返以前嘅事，就係咁嘅一個經歷，當然我唔希望生意上有好大嘅失敗，但係無論如何，你老咗嘅時候回頭睇，都會發現只係一個經歷。」
大同由出道以嚟只係同Fiona薛凱琪傳過緋聞，佢坦言自己一定有感情生活：「咁多年，唔多唔少一定會有。」佢當時話對感情事順其自然：「要天時地利人和、緣分，要適合自己，以及生活上嘅狀態配合到。」咁有冇機會同薛凱琪發展？佢重申：「佢咁忙，大家都咁忙。」
