【Viu】「Bobfather」林盛斌嘅巡迴棟篤笑經過4年、15站17場後，終極尾站重返香港，仲係Bob首登紅館舞台添！去到棟篤笑嘅中後段，Bob講到喺低谷嗰陣會聽張敬軒首《My Way》嚟激勵自己，之後更話要開金口獻唱，莫非佢想battle黃百鳴唱《記憶棉》、陶大宇唱《倒轉地球》？
點知就喺Bob開聲唱第一句嗰陣，軒公喺台側驚喜登場接唱，全場都被軒公surprise到！Bob感謝軒公百忙之中都抽時間嚟做嘉賓，之後佢哋就講起20年前喺新城電台相識嘅經過，輪到軒公感謝返Bob當年嘅照顧同一直支持！當軒公見到台下嘅張繼聰、謝安琪等老友，佢感觸談及對於摯友方大同近日病逝嘅心情。
過程中Bob係咁「取笑」軒公依家坐勞斯萊斯，又封佢做「隱形富豪遊樂場」，逼到軒公忍唔住自爆愛車最新動向！軒公今次亦唔係兩手揈揈咁嚟，準備咗兩份大禮，突爆Bobfather一個終極大秘密！想知堅要睇片啦！
另外，台上精彩台下亦星光熠熠，過百藝人朋友到場欣賞，包括汪明荃、薛家燕、蘇永康夫婦、「張氏夫婦」張繼聰同老婆謝安琪、姜皓文夫婦、Ali李佳芯、梁思浩、吳家樂、林作同裕美等等，可見Bob喺圈中人緣極好！其中梁思浩更係撐住拐杖現身，自爆晏晝跌親搞到左腳斷韌帶，帶傷都要嚟夠晒雷！快啲睇現場實況片啦！
