【Viu】周家怡、黃浩然今日齊齊以「至FIT安全駕駛大使」身份，「夫妻檔」出席活動！呢「兩公婆」沾沾冇扣過分，家怡仲自稱係優越駕駛者，雖然曾經有一次倒車唔小心撞到後面架車，但就係呢件事令佢揸車更謹慎！
後日就係一年一度嘅渣馬，兩位表示報咗半馬嘅賽事，惟家怡未跑先跌親，鬼馬食「選手」諧音自稱係「損手」，真係畀佢笑死！之後聽佢還原返跌親過程，家怡話當日係帶住朋友隻狗喺西貢海邊跑步，起步嗰陣就畀個地下kick親，右邊身落地嗰刻本能反應想做個鯉魚翻身自救，惜最後撻Q！
除咗手、腳受傷流血之外，最令家怡費解嘅係明明唔係背脊落地，但背脊都瘀咗一撻，莫非係內功太深厚，隔山打牛個friend「隔地瘀背脊」？而另一重點係家怡話聽到連隻狗都笑佢，黃浩然乘機大笑：「人唔笑狗都吠就係呢啲！」呢吓都真係入到應一應呀！
天文台預測渣馬當日最低氣溫得9度，黃浩然指越凍越跑得出好成績，仲醒咗各位跑手幾個tips添！佢嘅目標除咗係想跑出under 1小時50分之外，一早鎖定要同一男子selfie！至於會唔會喺終點等埋「老婆」家怡就話要再諗諗啦！「損手」家怡嘅目標成績又係咩？傷勢有冇影響佢練跑？即刻睇足本訪問啦！
